黨慶不設傳統拍賣環節,但就靠把口籌到唔少錢。出名係白鴿歌王嘅主席胡志偉噚日就打響頭炮,上台獻唱《萬水千山縱橫》一曲,獲冇現身嘅「潮州怒漢」詹培忠捐兩萬元贊助。
白鴿黨又特別製作搞笑短片娛賓,包括搵3名元老前立會議員仁哥、卿姐同單雞拍攝《尋找乳鴿的故事》,用搞笑方式畀貼士一眾乳鴿。乳鴿們亦親自上陣,拍攝唔同電影主題嘅惡搞片,要用演技競逐最佳議員獎項,點知最後奪得此獎,竟然係最近賣魚蛋牛丸打邊爐廣告,表情十足嘅前立會議員李華明!
李華明獲獎時都搞笑話:「我做議員時冇獎,我賣魚蛋你先畀個獎我?」透露唔少人喺廣告出街後,都問佢係咪「烚吓烚吓」,亦唔少人問佢攞腸仔食,李華明強調廣告中嘅食物,佢全部食過試過,仲去埋間食物廠睇過安全,先推薦畀大家食㗎!
李八方