【音樂入魂】
晚上11點半，荃灣一間打冷舖，門外掛着燒鵝、滷味，街坊在吮螄蚶。踢拖的老細同員工忽然清空二樓一張圓枱，揭開卡位座椅，抽出40吋大電視和混音器兩大部；未幾，又有人揹來兩部電子琴，在魚缸水泵聲中開壇唱歌，每個客人都聽到歌聲。

無代溝，90後、80後和70後各一，在「明記海鮮潮州菜館」裏表演的，就是這三代人的組合JAmosphere，他們在Uplive直播平台彈琴和音直播唱Live，歌藝絕對見得人。官方統計數字，五個月來他們每晚觀眾由十零廿人，飆升到千六、千八人，有的會駐足，有的只是路過，累計共賺二千蚊，用來買器材。
70後成員呂敬邦（Jason）是這打冷舖的老闆，從小愛唱歌，三歲已對着電視的幪面超人，咦咦吖吖不知在唱日文還是中文。讀書時行街、食飯、沖涼看電視都在唱。他曾參加新秀歌唱比賽，但自覺「嗰陣唔興我呢種樣」，最後被評判叮下台，加上阿媽一句：「你做到關正傑先講啦。」當年關正傑既是紅歌手也是建築師，「我點做箒？」思前想後，他就放棄歌星夢了。

中佬四十任我行 一周四晚11點半開壇

Jason：「90年代，我未有自己嘅獨立意志去思考，所有人都走同一條路，由讀書年代香港已經講同一件事，慢慢你會走進一個都市模式，搵食、搵更好生活、吃好啲、開名車，一定會進入呢個模式。」有年他去外地考潛水牌，被公司急call回港處理公事，不久發現自己經年捱夜，多毛病又血壓高，已經不能潛水。這才赫然發現，忙碌半生，最想做的事已隨年日離他而去。來到四十幾不惑之年，Jason好清楚自己廿多年錯失了甚麼，但更明白現在可以做甚麼，「香港就係咁，個個到四五十歲先發現一生營營役役，咁香港就真係乜都冇咯。」他喜歡陳奕迅《任我行》，哼歌：「從何時你也學會不要離群，從何時發覺沒有同伴不行……頑童大了沒那麼笨，可以聚腳於康莊旅途然後同沐浴溫泉，為何在傘外獨行……」這幾句歌詞，他很有共鳴，「你喜歡安安穩穩咁做羊開心啲的話，咁就冇問題，但若果你發現自己唔想做羊，你每日都做羊要做嘅事，做得好唔開心，咁就企出傘外，喺雨傘外獨行。」
90後成員吳雋諺（Andy）從小想做歌手，都得過一些小獎。雖然發歌星夢，但他沒正式上課學藝。沉默半晌，他道出原因：「因為……冇錢。」現實是現實，沒錯媽媽是好支持他的，但飯始終要吃，租始終都要交。混混沌沌打過幾份工，Andy：「我以前係好冇方向好冇目標嘅，但Jason一直同我講：『做喇，你有能力就去追，就去闖，咪畀自己藉口。』」後來他到Jason這打冷店幫忙，與對方一見如故，之後一星期有四晚，深夜11點半至凌晨1點，他們就開壇唱歌，「以前嘅工作係你行一世都走唔上舞台，透過呢個平台，我可以做番一個我想做嘅自己。」成就此事只因一個念頭，Jason某日坐在準備開門的店舖裏心想：「有個空間喺度唔好嘥吖。」如此這般，與同樣愛唱歌的員工Andy，搞場認真的直播。
Andy還記得頭兩場Live，他帶來電腦Mon，另一80後成員張顯榮（Timothy）又帶來兩支咪，Jason撥出大圓枱。默契瞬間就來，他們感情纏綿地唱，食客則繼續吮螄蚶。唱着唱着，他們發現幾個路過的街坊站在二樓梯口拍手掌，「嚇親，但又好開心，」平時為歌手彈琴伴奏的Timothy：「我好喜歡明記，生活最接近我，就係我最舒服嘅事。」一時手痕，他來個《The Phantom Of The Opera》前奏，Jason又即興唱。Timothy是職業琴師，但在打冷舖直播，有現場觀眾即時點唱、讚美或拍手，比在舞台上獲得的掌聲更開心。「為明星伴奏點都會有掌聲，呢度你唱得好聽就一定有人拍掌，唱得唔好客人會繼續食飯，呢種互動，你唔會喺其他大平台搵到。」

劏房女住客 「落嚟呢度唱好開心」

五個月來，由用手機Mon直播變到現在用電腦直播，添置混音器，還多了支懷舊咪stand，演出者開始越來越多，如Andy的和音女友、兩個結他手、兩個琴手、一個鼓手，不過鼓手怕吵到居民，暫未登場，還有兩個主持和愛唱歌的人，包括女歌手Movie，她是鄰近街坊，住劏房的她下班回家已是12點多，「唱歌會俾鄰居拍門投訴好尷尬，但細細聲，又唱唔出感情。落嚟呢度唱好開心，又可以練歌。」自high好開心，Andy在這打冷舖演出，獲賞識接過活動表演，未來還會有第二次。追夢好緊要，追的，不是熱血漫畫式的成功，是如何尋回自己，滋養心靈的路。

Uplive賬號：JAmosphere
明記海鮮潮州菜館　荃灣鱟地坊68號地下

記者：陳慧敏
攝影：Leo@BBfilmmaker