商人羅傑承俾人感覺豪邁，想不到佢女兒羅雪儀（Cherry）屬於溫婉一類，個子嬌滴滴，一見人就主動介紹自己「你好，我係Cherry」十分有禮，唔似被寵壞嘅太子女。佢工作時間必定稱呼爸爸做「老闆」，就係費事俾人認定係太子女，想公私分明。
Cherry今年30歲，2009年畢業於瑞士酒店管理學院之後，冇耐就返港幫爸爸打理飲食生意，旗下有RedMR、上海佬餐館、來佬餐館等5個品牌。佢指，中學時期就知道自己鍾意做飲食業，於是去瑞士修讀款待及活動策劃。

曾在酒店做門僮

呢位太子女都算係捱得。佢憶述，讀酒店第一年，專登回港喺海景嘉福酒店做3個月實習，第一個月負責做門僮。佢承認，最初有唔開心，「每日都要企得好直，當時唔明點解要做開門」一星期後適應下來，做咗一個月開門就轉做侍應、接待員，自此明白每個崗位都唔易做。
佢最初幫爸爸打理飲食生意都辛苦，主要因為冇經驗，要跟資深同事磨合，太子女嘅身份多少又有點重量，佢想做到公私分明，工作時間必定稱呼爸爸做老闆，羅傑承亦只叫佢英文名。
Cherry形容爸爸係嚴格嘅老闆，要求佢將目標、水準定得高，「爸爸認為，如果每件事唔定到100分，出嚟就會差」，久而久之，Cherry對旗下每間餐廳嘅細節位、員工對食物嘅認識都好有要求，羅傑承亦開始放心將呢盤生意交畀阿女了。

李華華
mailto:[email protected]