【新增短片】
有意參加出年3月港島區補選嘅香港眾志常委周庭，同被DQ嘅前立法會議員羅冠聰趁尋日聖誕節出席一個社區活動，仲大開金口獻唱，除咗一齊合唱傳統聖誕歌《Jingle bell》之外，周庭仲同羅冠聰就各自獨唱《你是你本身的傳奇》同《18》，希望同年青人分享追夢的掙扎。周庭今日再分享時就話今個聖誕好難忘，因為佢以往聖誕都宅喺屋企上網，今年係第一次聖誕夜有活動！

尋日香港眾志幾個後生仔趁聖誕出席一個社區活動，首次以香港眾志嘅名義出隊busking，即係做吓街頭表演咁。周庭先獨唱方皓玟嘅《你是你本身的傳奇》，而阿聰就唱咗BEYOND嘅《18》。阿聰話兩首歌都係講成長嘅困惑，同年青人喺理想同現實之間的掙扎。雖然阿聰話唱歌唔係佢哋本行，周庭又帶病上陣，但佢兩個都唱到有板有眼，獲得台下唔少掌聲。

周庭事後自爆係第一次喺睡房、浴室、卡啦OK以外唱歌，仲話今年係最難忘聖誕節，因為佢以往都因為怕人多同貴，留喺屋企一個人上網過聖誕，所以尋日係佢第一次聖誕夜有活動！至於香港眾志秘書長黃之鋒都話自己好慶幸，以為聖誕、除夕會因為佔旺案而要喺監獄過，今次聖誕可以出返嚟，同屋企人、身邊嘅人過節都覺得好開心。佢又話聖誕會休息一下、食下嘢同打下機。