當年今日
關於我們

泊到大碼頭
股路縱橫:華脈脫胎換骨

蘋果日報 2003/08/20 00:00


港股噚日高開低收,恒指一度高見10617,但午後掉頭回落,收市雖仍企穩10500大關之上,但氣氛已逆轉,恒指埋單跌15點。
大市連升6日後已乏力,噚日衝多一段後已無以為繼,事實上,今個升浪由9924起步,到10618,升近700點,調整一吓係好事,後市發展亦會更健康。今次調整,幅度不會大,估計在月初高位10300水平會有支持,小周期的低潮會在周五出現,整固完成後,下周可再向高位進發。
噚日下跌股(不計認股證)有370多隻,唔少國企同近期急升的二三線股都趁勢調整,國企正陸續派中期成績表,基金計過數後會再重新部署,高增長股仍係下一個升浪嘅火車頭。近期確實有基金趁高位滲貨出街,但相對佢哋嘅持貨量實屬微不足道,佢哋亦唔排除遲啲調整完之後會買番,下一個浪,國企仍係主流嘅炒作對象。

轉型發展科技業務
講番細價股,近期升得最勁嘅,相信非華脈通信(499)莫屬,短短5日之內,由8.6仙扯上14.4仙,升幅67%,噚日午後跟市調整,但收13.3仙,亦只係微跌1個位,急升之後,高位承接力仍相當強。
華脈原本做地產,2000年重整業務,進軍高科技及電訊業務,噚日有消息,話華脈已出售北京龍苑別墅,套現約2600萬元人民幣,相信其他地產項目(主要位於香港)亦會陸續出售,全力向科技業務轉型。
過去一年,華脈已透過香港泰信向廣東泰信提供短訊業務的支援服務,最近並收購另一家短訊服務公司GlobalEdge,加強此方面發展。廣東泰信係廣東省電信實業集團的關連企業,後者係廣東省電信的全資子公司,淨資產值72億元人民幣,年營業額60億元人民幣。華脈與廣泰有業務關係,唔排除日後有機會將合作層面推上廣電的層次,甚至會有注資或入股的可能性。
華脈發行30億股,市值約4億元,3大股東持股量均只約12%-13%,而公眾持股量更逾5成,此類股權分散嘅公司,正係收購嘅理想對象。
郭兆誠