開咗台差唔多一個月嘅HKTV（港視），負責打頭陣嘅兩套劇集《選戰》同埋《警界線》播出得到網民讚賞。點知好戲在後頭，緊接喺《警》劇推出嘅《來生不做香港人》，播咗首集網民即刻叫好。有人覺得《來》劇雖然有大台嘅影子，但係對白自然好多，馮仁昭覺得一套劇嘅名好緊要，事關最初《來》嘅戲名叫《客家女人》，淨係睇個名都覺得唔吸引，𠵱家叫做《來生不做香港人》，即刻好有feel！

噚日馮仁昭搵咗套劇嘅導演陸天華，解開戲名呢個謎團，佢喺電話度話：「其實《來生不做香港人》先至係原名，嗰陣有好多景要喺內地取景，如果用呢個名怕太敏感，所以咪改《客家女人》中性啲，拍完之後中港矛盾都好激烈，曾經同王生（王維基）商量過好唔好改名，點知佢話唔使改，話呢個名先可以挑起話題。」佢又話唔會偏幫任何一邊：「要將事實喺套戲講出嚟！」劉美君做呢個土豪家姐已經好稱職，張可頤港女妹妹亦好淋漓盡致，不過陳丹丹呢個教育水平好高嘅內地人，喺戲裏面同張可頤喺工作上有唔少鬥法，甚至連佢男友潘燦良嘅感情都入侵埋，睇嚟又會勾起另一種話題！
撰文：馮仁昭