左報《大公報》趁鄧小平誕辰110周年，噚日請嚟一班「愛國愛黨」人士出席座談會，要求佢哋「結合自己親身經歷，分享自己心中的鄧公」。一眾愛黨人士聞言後，全程對鄧小平89年下令屠殺學生隻字不提，再發功「擦鞋」狂讚鄧小平。
其中全國政協常委陳永棋話，鄧小平唔只係中國偉人，對世界貢獻更係「20世紀無人能夠超越」，喺佢心目中係「最偉大人物」。欲罷不能嘅陳永棋接住話，一世人最大遺憾，就係冇親眼見過鄧小平一眼，「唔講話握過手，我根本係未正式喺同一場合見過佢（鄧小平），呢樣對我嚟講係畢生遺憾，即係好似好近嘅嘢、亦都係好遠嘅嘢，我就一世人冇咗咁嘅機會。」

當大家以為陳永棋肉麻拍馬屁論無出其右之際，坐喺佢旁邊嘅福建社聯會副主席周安達源，發言不足一分鐘，陳永棋即時被K.O.。話說周安達源發言時，話17年前參加香港回歸慶典時，曾帶咗幅鄧公畫像到場，最終卻因幅畫太皺皮，冇攞出來影相，慨嘆「17年前嘅遺憾一直喺我心中」後，更即場爆喊！
咁都未止呀！講到鄧小平97年2月去世時，曾一個月內停止所有娛樂活動，周又突然狂喊，要由同場嘅民建聯副主席陳勇遞紙巾安慰。擦鞋擦到七情上面嘅表現，連陳永棋都側晒目睇到呆咗。輸咗一仗嘅陳永棋唔知係覺得冇面定嚇親，一如老董以「腳痛」為由提早下台離場，同記者話：「我真係要睇醫生。」

李八方
mailto:[email protected]