提起「美食沙漠」，馬鞍山人一定認為自已身處嗰區冇得輸。講吓背景，一直來來嘅核心活動範圍，就係商場、商場、同商場。無論係商舖定食肆，都係圍繞港鐵嘅馬鞍山中心商場、馬鞍山廣場、新港城廣場及新港城中心。

馬鞍山居民張小姐接受訪問時就狂呻，本來呢度都唔係好夠食肆，不過近年陸續有新樓落成，加上有好多自由行進駐，商場得返貴價餐廳，仲要排好耐！好似和民同元氣，好多時要排兩粒鐘都冇未必有得食。

一直關注馬鞍山「搵食」問題嘅沙田區區議員麥潤培，接受本報訪問時就話，「馬鞍山有樣嘢好得意，係幾劣食都要排隊。」佢又話，隨著恒基地產（012）旗下的迎海入伙，之後欣安邨亦會入伙，「美食沙漠只會更乾旱。馬鞍山係連宵夜檔都冇，好陰功。」

佢話近年的確係多咗餐廳進駐，不過，土地問題下，「貴晒啦，所以小店未必租得起商場。我地希望有價錢相宜嘅連鎖店進駐，但連吉野家都冇。當你見到馬鞍山人連吉野家都渴求，你就知呢區真係冇咩好嘢食。」佢話佢一直都有聯絡過吉野家，但吉野家本身有佢哋嘅要求，「佢哋想要一間2000呎大舖，所以仲搵緊。」

根據市場消息，上述商場的零售租戶呎租由40至90元不等，而餐飲租客呎租約30至60元。至於烏溪沙站新商場迎海薈，呎租約20至60元。其中市場錄得2樓1個3,360方呎舖位，啱啱由食肆承租，月租7.4萬元，呎租22元。

想知馬鞍山近年入伙新盤平定貴？請繼續留意蘋果財經即時新聞。

記者:倪敏慧、湯家明、程俊華

掌握財經生活資訊，即Like「蘋果ATM」fb專頁啦！
http://fb.com/appledailyatm