大概兩個禮拜之前，當我仲喺墨爾本進行緊training嘅時候，放break得閒無聊碌下Facebook，見到好多維珍同事都post同一個人嘅相，然後寫住「rest in peace」。到咗夜晚，有一個維珍同事嚟咗我哋apartment探我哋，佢話原來嗰位同事喺當日朝早自殺，不幸過咗身。

呢位同事並唔係飛香港呢條線，所以其實我未同佢飛過，亦都未見過佢。佢嘅離世令到好多其他同事都好傷心，好多人都post返同佢一齊出去玩過嘅合照出嚟懷念佢，同事亦形容佢係一個對人好好、好開朗嘅人。但係點解一個咁開朗嘅人，會選擇自殺呢？

雖然我唔知澳洲情況，但喺香港，每二十個人就有一個人抑鬱，甚至有調查顯示40%嘅人認為自己有情緒問題。而抑鬱其實係腦入面缺少咗一種可以分泌快樂嘅物質，所以好多時，並唔係患者自己可以選擇去開唔開心，而係生理上令佢哋無辦法開心。

而我認為，作為飛傭，比起其他人係更加容易有壓力或情緒問題。

外國文化其中一樣好好嘅係，佢哋每次見面，都會問人：「How are you?」等同中文嘅：「你點呀？」之前試過有親戚過身，返工時有同事察覺到我有啲唔妥，而問我發生咩事，講咗出嚟真係舒服好多。但作為飛傭，無論你經歷緊啲咩，一上到機，你都必須以笑容視人。對住客，你要盡顯耐心，畀佢feel到你嘅熱情款待；對住同事，你要表現你係一個好nice、好easy to work with嘅人。一返工，所有情緒都要即刻擺低，搖身一變，成為一個笑容滿面、正能量滿滿嘅人。

每次layover，去到外地，公司係會安排一個人有一間酒店房，好多人覺得好爽，有埋酒店畀你住。但當你飛過同一個地方多過十次，每一次都係得係自己對住寧靜嘅四面牆。當你嘅朋友禮拜六日放假去玩，你大部份時間都join唔到，而每一次未必都有啱玩啱傾嘅同事，你好有可能要自己出去城市探索、自己食飯。有時遇正大時大節返工，絕對係會有人在異鄉嘅孤獨感覺。

當你面對完呢種孤獨，好快你又要換返制服，上到機繼續笑面迎人。

空中飛傭係一份好challenging嘅工作，除咗日夜顛倒，仲係一份要對住好多人、要有好高EQ嘅工。有時為咗要保持住呢個專業形象，我哋好似忽略咗自己或者其他同事嘅感受，以為佢笑緊就係開心，有時似乎重視個task多過眼前呢個實實在在嘅人。其實飛傭都係人，而唔係robots，都有感受、有情緒失控嘅時候。有時做同事，一句簡單問候，對佢嚟講已經係一個好大嘅安慰。作為乘客嘅你哋，希望你哋都可以體諒多啲我哋，欣賞我哋為你哋展現過嘅笑容。

“The truth is that many people struggle. They may be good at smiling through their pain in public but behind closed doors they fight a battle every day just to survive. So don’t presume, don't judge and be kind. Always.”

專欄作者簡介：
傭仔
做過廣告、設計、插畫，而家係香港茄子航空嘅一名空少，喺維記澳洲航空交流中。2016年曾出版人生第一本繪本《空少傭乜易》，夢想係成為一個少女系漫畫家。用文字同插畫，同您分享喺飛機上面工作嘅點滴。

Facebook專頁：空中飛傭 The Flying Maid
www.facebook.com/theflyingmaid

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland