「何事我會妒忌我會擔心魔鬼搶走你，何事我每次都不知不覺越來越想你……」

面前哼着這首老餅K歌《開始戀愛》的，正是原唱E-kids，也是他們重組後首次在人前自彈自唱。單是綵排便排了三次，就連「遲到王」阮民安（Tommy）也一早到場set頭準備，可見重視程度。林詠倫（Alan）、郁禮賢（Tim）和Tommy，三個加埋過百歲，再不是kids了，少了年少輕狂的躁動，卻多了飽歷風霜的佬味。無他，每提起E-kids，總伴隨一陣滑稽味，其音樂風格被戲謔為「MK-Pop」鼻祖，其會考成績被翻炒出來恥笑。直至近年吹起集體回憶風，大家才意識E-kids當年真的紅過風光過，始留意「樂壇小強」Tommy的音樂才華，方醒覺新不如舊的無奈。

記者：吉吉、倩宜　攝影：NEO、仇志德

當年E-kids拆夥，也許是三人理念不合所致，但主因其實是公司問題。Alan說：「第一就是公司，突然間執笠。其實我們拆夥是很不完美。」Tim補充：「應該是沙士那段時間，試想想成條街連酒樓都可以狂執的時候……」Alan插嘴：「E-kids又點可以唔收（檔）呢！」然而，當年不和傳聞卻是千真萬確，Tommy忽然嚴肅起來：「其實這次重聚，我們頭兩三次見面都是吵大鑊，嘈交嘈到不得了！」原來當年Alan和Tim開騷，受訪時提及Tommy，言語間產生誤會，而這誤會卻刺中不死小強的死穴，令他屈藏心底多年不能抒發，Tommy說：「因為在乎，先至咁唔開心，如果唔係，話知你啦！」

經過一場「和頭飯局」，兩人三口六面講清楚，冤屈一掃而空，亦更加珍惜這份友誼。當然，他們亦明白要趁天時地利人和，放膽在樂壇博多博。Alan說：「其實因為上年年尾，以前經理人文滌（簡文滌）突然打畀我哋，問有冇興趣重組E-kids。我覺得佢係最清楚我哋三個，而我自己意願都開心嘅，很難得嘅一個機會，尤其是我哋好耐冇聯絡。」

至於被譏諷為MK-Pop鼻組，問E-kids可有不高興？Tommy快人快語：「得啦，冇所謂，最驚你唔當我哋係！當年我哋做過一個訪問，講過話與其喺中環包尾，不如喺MK做第一。其實唔知點解香港人會覺得MK係問題，我好多外地朋友，嚟香港一定會去MK。即係你去到台灣，你唔會笑人你好西門町！」

既然改變不到別人看法，便唯有接受了，正如歲月流逝，也只好調整心態。Tommy說：「當然想繼續保持我哋嘅童真、我哋嘅幼稚，但始終都三十幾，唔會諗一個特定形象畀自己嘞。」E-kids回歸，相信最大驚喜不是他們的歌曲，而是三人的成長與蛻變。　

場地：Solari Music Centre
髮型：Reborn Hair
化妝：Wasabi