今期元旦（1月1日）功課足足準備咗兩年，由2018寫到2019，連阿豬媽都覺得我好勤力。

懶過蛇嘅我，呢刻轉死性真心有啲怪異，全村人都當我精神錯亂，不解釋，繼續低頭刨到出煙。我都唔打算同佢哋講，回顧今季呢四個月，我好似只限對度馬有啲要求。

面對住買W得P，買P跑第四，Q腳齊晒膽無影，我全部都會扯火！做人要善良，跑馬用真錢，「善良之鎗」唔該行開，呼！抹走啲新仇舊恨，我又復活啦！

第三場四班1200米，「盈華盛甲」作為一隻擺中間等機會爆後勁嘅短途馬，今鋪應該幾好跑。同埋有減磅優惠嘅「大四喜」同「競駿時代」放，步速夠快無咁易塞，有利後上一族。

講番「盈華盛甲」，上季贏馬一役蝕少少步速，直路逢馬過馬，殺低一眾熱門。今季三場hea過我，減夠分亦夠熱身，埋門工夫勁過上次贏馬，賀賢如箭在弦上，希望頭圍用膳食到我有個好開始。2019，祝大家好好運仔。