翁靜晶承諾會接法緩個案
預計港英兩邊飛

蘋果日報 2017/08/09 05:20

翁靜晶定慧寺中國律師執業考試

翁靜晶於兩年前怒揭定慧寺家醜,身為董事嘅佢狀告上高等法院,預計官司要拖足10年。

為咗應付龐大嘅官司費用,翁靜晶早前決定復出做律師,早前由英國旅行返港後就開始上班,仲報讀中國律師執業考試。翁靜晶前日接受《蘋果》電話訪問時,坦言現在好忙,佢話被《蘋果》讀者影到當日,都係趁返學前同男友抽空見面,佢話﹕「嗰日要返中國法律課程,飲完杯嘢都要返學,佢專登嚟搵我。(幾時考試?)其實我最後未必有時間去考試,因為要讀頗長時間,合格率又低;加上我即使成功考到都唔會去中國掛牌做律師,我只係想了解多啲中國法律。」

由於兩年前已退休,現在重新執業,要登記好多手續,翁靜晶話﹕「有好多表格要填,因為我都想做番對社會有意義嘅事,所以要登記政府當值及法援律師,向來有做法援,幫啲值得幫嘅人。(好少錢?)預咗,我都鍾意小朋友,尤其希望幫助一啲虐兒個案。」而翁靜晶同時擁有香港及英國執業律師資格,佢話公司遲啲都可以會派佢到英國工作。