一向直言不諱嘅巴塞隆拿中堅碧基，近日發表親加泰羅尼亞立場言論，引起軒然大波，但馬德里體育會左閘菲臘路爾斯，就反而讚佢敢於堅持自己立場。

加泰羅尼亞舉行獨立公投，碧基感性發言，呼籲市民投票。碧基發表完感想後，近日成為媒體焦點，親西班牙嘅球迷當然唔會放過佢，除咗訓練嗰陣噓佢，當佢喺世盃外圍賽對陣阿爾巴尼亞被換走時，大部份人歡呼拍掌，真係冷嘲熱諷做齊晒。不過，菲臘路爾斯就相當欣賞佢，仲話足球員應該學佢。

呢位「菲臘佬」咁講：「我係佢fans，雖然我成日唔同意佢講嘅嘢，但佢敢講，就好似艾比路亞（已退役前皇馬球員）咁。佢哋都係嗰啲唔會因為自己嘅名聲而唔講真心話嘅人，令人佩服，真係希望有多啲咁嘅球員。」

但係長居西班牙12年嘅路爾斯，並唔想加泰脫離西班牙：「我每日都留意住加泰獨立公投，但我唔明白點解佢哋要獨立。我當然尊重佢哋嘅諗法，但係成個世界都傾向團結同開放，我唔係好接受到有社區想閉關自守。」

佢又以巴西作為例子：「當國歌奏起，不論左派定右派，人民都以國家為傲，所以我唔明點解西班牙唔可以咁。點解想獨立？點解會覺得獨立咗更好？」

周六馬體會主場火拼巴塞隆拿，碧基會選擇係球場定係媒體回應佢呢？