何家淑女近日感情似乎唔多順利，賭王三太陳婉珍嘅兩位千金超雲同超蓮，原先都同男朋友好甜蜜，點知早排超雲失驚無神同皮草太子爺男友王大業（Andy）分手，跟住仲無厘頭話佢同林峯撻着，近日又傳超蓮同男朋友Jeremy鬧分手，女方仲喺facebook寫明家單身，擺明歡迎各方追求。
噚晚超蓮同超雲到尖沙嘴出席東華活動撐媽咪，當問佢家係咪單身時？超蓮話：「唔知，我都唔清楚，唔知係咪分手，不過我哋噚日都有見面，有聯絡。」超蓮又話唔知大家係咪冷戰中，Jeremy係咪衰花心？超蓮又撐番男友話：「唔係，佢對我好好，只係對我好。」有冇喊？超蓮答：「唔開心就梗會喊，家心情都OK。」超雲馬上安慰細妹：「咁細個拍多幾次攞經驗冇乜問題啫。」
之後三太都一齊訪問，講到超蓮冇帶Jeremy出現，三太話：「想帶咪帶，咁細個有冇男友我都唔擔心。」有冇教吓兩個女點處理男女關係，超雲搶住答：「媽咪只有爹哋一個，我哋教番佢轉頭就真。」會唔會擔心超蓮甩拖？超蓮自己搶答：「我冇話我甩拖o架。」而超雲都澄清同林峯完全唔識，只係工作上有合作。

蔡加敏有喜4個月

蔡加敏同老公一齊出現，已經有個女嘅佢公佈喜訊，原來佢有咗4個幾月，家大約重咗5磅左右。不過蔡加敏話今次陀BB比上次辛苦，佢話：「今次成日暈同嘔，上次食好多嘢，但今次只想食菜同清淡嘅嘢。」佢話雖然照咗超聲波，但未確實係仔定女，預產期喺明年2月。
此外，早前同霍啟剛傳緋聞嘅台灣主播趙彤亦有到場，講到郭晶晶日前嚟香港同男友表現甜蜜，佢話呢啲係應該，至於有人話晶晶整容，趙彤話：「我唔信，各人有唔同氣質，化妝都可以令人靚，我同佢大家有唔同感覺，各花入各眼。」