演員要演好一個角色，好多時都抽離唔角色，要經過一段時間嘅沉淪，先可以重回現實嘅生活軌道。剛憑《血觀音》喺台灣金馬獎奪得影后嘅惠英紅，就未有受到呢個問題所困擾。

小紅姐提到，《血觀音》拍了兩個月，佢自言從來未試過抽離唔到角色，「我有個習慣，開鏡前一個禮拜，我會用嗰個角色生活，模仿佢嘅生活習慣，自然咗佢，馴服咗佢，變咗我埋位時，我下意識已經知個角色反應係乜嘢，唔使去諗。可能係因為咁，所以我好清晰我幾時係演緊角色，幾時係做緊真實。一嗌cut我已經唔係嗰個人，大家都話我好犀利。我從來都唔俾自己混淆。我係要remind自己，嗰樣係工作，呢樣係真實。唔使好冷靜至做到，一個人只要習慣咗就自自然然得。導演都話我變得幾快喎，真係『戲子』喎，我答佢：『人生如戲，戲如人生』其實係真嘅。」

「我知道呢個世畀有啲咩嘢，咩人，幾十億裏面，點會冇棠夫人？你話如果得十億人口，咁我覺得起碼一億、或者兩億嘅人係咁。你話佢係壞人咩？佢只係社會犧牲品，喺社會搵到個生存嘅位置。冇人天生係壞人，但我唔相信人有完美。爾虞我詐無時無刻都發生，個個掛住自己利益嘅時候就發生，但有冇壞處呢？佢都係為自己好。棠夫人都係由社會低層，咁淒涼，掙扎到o依家棠夫人，老公死咗之後先可以坐到呢個位，想用權力鞏固自己。佢覺得啲女陪啲官，去攞到權力鞏固佢自己，佢又覺得好安全。『我咁樣做有咩唔好？』我真係見過呢啲人，『我個女幾好吖，不如去陪下啲富二代吖？』要搵呢啲唔難。」

更多娛聞，喺晒《娛果》
http://fb.com/appledailyent