經紀陳話跌得古怪嘅華藝銅業（559），噚日再跌38.28％，收0.395元，情況異常駭人，認真係好嘅唔靈醜嘅靈。
另外，早前歐美與中國在成衣配額問題上有爭拗，黛麗斯（333）同其他紡織股一齊受到影響，股價裹足不前，但噚日突然大升8.79％，收2.475元，接近52周高位，成交股數301萬股，金額725.35萬元。

成本下降　將有併購

經紀黃話，據講有證券界人士見過公司管理層，表示因為成本下降，可令盈利保持增長。另外，據聞黛麗斯在今年內會有收購合併活動，目標係大陸嘅分銷零售網絡，料產生協同作用，提升公司盈利。
經紀黃又話，泰興（389）涉嫌造假帳事件，在基金界引起極大震撼，所以家陣啲工業股稍有風吹草動，隨時會出現急跌的的洗倉格局。
如果大家唔善忘，黛麗斯多年前經過債務重組一劫，家陣公司仍然企得住，兼且重新成為基金股，擺明芬佬對佢有信心。
慕容小初