噚日重陽節有位粉嶺嘅街坊，中午食晏時段見到啲人排晒長龍，仲以為假期都擠提！望真啲原來係腸粉店啲客人，排隊買平價小食。可以有幾平？粉嶺街坊starksouth將價目放上討論區──「腸粉：一蚊一條，最少買兩條；魚蛋兩蚊6粒，最少買兩蚊；燒賣兩蚊4粒，最少買兩蚊。」佢仲話，食飽最低消費都只係4蚊啫，抵食夾大件，唔怪得其門如市！
PEELGOOD搭嘴話：「抵到爛！大手掃貨係時候！」股市就話有平貨畀你都唔敢執啫，食嘢又唔同講法，九重天話：「魚蛋兩蚊6粒，最少買兩蚊；買入一球，持貨5年，以5蚊沽出兩粒。」冇股炒就炒魚蛋都得！