早排，聯通（762）「混改」方案出台，令孫柏文諗咗好耐究竟贏家是誰？純睇股價，入股或被入股嘅，全部冇料到。

點解？「混改」其實似當年向中石油（857）抽暴利稅咁。今次只係向啲互聯網公司，例如騰訊（700）同賊中賊開刀。「國退民進」？哈。

咁搞乜？上週睇《有線》，大陸啲廢青只係想搵夠後就上網打機，返一日打三日。即上網已成政權維穩極重要工具。亦即中移（941）、聯通冇得加價cap水，不過就要繼續投資為網提速。因lag機是會暴動的。

仲有，中移已富可敵國，有潛質成挑戰中央嘅機構，所以一定要制衡。聯通今次揼心口籌750億人仔，加埋手上現金，都只係千多億，即中移嘅四分一。所以政府點都要死啲錢俾聯通投資，最好5G市場一半半互相制衡。

咁買乜？好多人讚落實混改「好快」。咁快，係因中移已越贏越遠，要追，就要快籌錢舖網追。而中移亦陽奉陰違咁瘋狂更新個網。所以要買，就一定買設備股。基金都知，所以中興（763）今年已升五成。不過做塔上接收器嘅摩比（947）就因市值太細被遺棄。而最振奮，就係佢喺六月尾中移最新一輪投標，成接收器最大供應商，地位躍變龍頭。

呢兩年摩比收入、股價走勢，就好似2011年尾之後兩年。跟住就喺2013年尾因4G訂單出，三個月升一倍。佢十日前出咗份盈利跌八成嘅中期業績後，開始不斷回購，股價係咁升。2017年尾，到5G，混改後啲錢將湧出，公司已一注獨贏摩比。你呢？

孫柏文

蘋果財經，關心你飯碗
http://fb.com/appledailyatm