賭仔大部份姓「賴」，但更多賭仔唔止姓「賴」，仲鍾意喺適當嘅時候扮懵，出發點可能係娛人、娛己，得意布甸狗喺yahoo知識度見到一個網友唔知詐儍定扮懵，鋪咗兩條問題請教大家，其中一條係：「買咗平安保險（2318），不過佢股價波動大，搞到我囉囉攣，內心一啲都唔平安，我可唔可以退股，同要間公司賠償我心靈上創傷？」
LK22回應：「如果咁都有得賠，咁我諗冇邊間公司敢上市。」
Jimmyson就話：「佢有投保可能得，做股東就……」
當大家不斷搵問題答案嘅時候，網友仙股神發現，原來呢位「問題散戶」仲有一個經典問題：「我持有一手碧桂園（2007），可唔可以憑股票換領一幢碧桂園別墅？」

碧桂園股東送別墅？

問埋啲咁嘅問題，相信都係扮懵機會大啲。不過，都有網友回應，rainrain話：「我持有長實（001），可唔可以憑股票換領李生家中廁所？」
via123就話：「咁多人有中資銀行股，咁個個都可以叫銀行家，印番張卡片叫Banker先。」講吓笑啫，都話娛人、娛己咯，唔好咁認真啦！

http://www12.discuss.com.hk/viewthread.php?tid=4626627&extra=page%3D2