【爆相爆片】兩黑幫尖沙嘴樓上吧起爭執 擸架生見人就打
尖沙嘴黑幫寶勒巷話事人
尖沙嘴爭做話事人?日前有多位讀者報料,指兩批不同幫派嘅黑幫人馬,懷疑涉及地盤利益問題,有人拎住刀棍方喺一間樓上吧喊打喊殺,有人被打到爆晒缸,夜店CCTV拍低全個「掃場」過程,唔講以為自己睇緊《古惑仔》電影。
聽返消息人士講,上星期一晚,一班有黑幫背景嘅酒客喺尖沙嘴寶勒巷一間樓上吧消遣,懷疑同現場人士有爭執,於是一班負責睇場嘅陀地戴上口罩,擸晒刀棍到場晒馬,最後出手教訓對方,從CCTV片段見到,成班黑漢並非善男信女,一見目標人馬,二話不說持棍狂毆,當時喺度飲酒嘅人馬手無寸鐵,只好且戰且退,有人由枱面捱打到匿入DJ枱,仲要一路畀對方狂扑手腳,一邊潑埋啤酒淋全身,事後周身瘀傷,亦有人畀黑漢用棍狂毆分幾鐘,即使有男友人幫拖伸手阻止,結果都要頭破血流收場,成班酒客最終敗走逃離現場。
畀人打嘅一幫人馬係咪就此偃旗息鼓?梗係唔係啦!據消息人士講,對方喺5日後「番卓」,去到山林道對方打骰酒吧鬧事,成班睇場聞訊拎晒架生戒備,其中一個小頭目表明身份:「我哋喺勝和嘅,我哋跟『魚蛋』,冷靜!」,血戰隨時一觸即發,最終點樣收場就冇人知,我哋問過警方,呢兩日未有相關案件,好大機會兩幫人「江湖事江湖了」,但肯定係黑吃黑,如果有客咁啱喺度無辜被斬就無謂咯!
警方表示案件已由油尖警區反三合會行動組跟進,初步調查顯示有人分別於12月10日及12月11日在尖沙嘴區內兩個娛樂場所懷疑從事不法活動,其後警員拘捕一名27歲姓楊男子,涉嫌藏有攻擊性武器及傷人,他已獲准保釋候查,須於2019年1月上旬向警方報到。