呢排「美魔女」三字勁hit，好似周慧敏、羅霖、李嘉欣咁，都俾人冠以美魔女嘅稱號，不過其實娛樂圈唔少女星咁識保養自己，又點會淨係只得三個美魔女丫？好似46歲嘅陳法蓉同45歲嘅王韾平咁，由於保養得宜，所以即使素顏示人，依然係靚爆鏡！

陳法蓉同王韾平噚晚同向海嵐、陳煒及賈思樂等，幫一樣都係4月生日嘅林漪娸同何國鉦搞生日party。

陳法蓉、陳煒同另一位朋友更加親自下煮，炮製花膠鵝掌、泰式香茅檸檬茶、紅莓啫喱等美食，估唔到幾位靚女除咗有美貌之外，廚藝亦都相當耍家，令當晚個個食到唔停得口，林漪娸仲話因為味花膠鵝掌有大量collagen（骨膠原），所以大家食完都即時變靚晒！