正所謂水為財，有錢佬啲錢多到瀉，鍾意玩吓艇好普通，各有少少特殊癖好亦都好正常。八方最近就聽聞地產界嘅堅叔（唔係奸人堅，係新世界發展執行董事梁志堅）對船都有一種獨特嘅情意結，而且玩法夠慳家又實惠，講緊嘅係喺紙上放船，但唔係細路仔摺紙船，而係喺啲樓書無敵海景上面放船喎！
成件事係咁嘅，逢親啲地產商推出新盤，就算冇報價單都一定會有樓書，整埋晒啲洋仔洋妞靚風景靚海景介紹吓個新盤點正，譬如話大把郊區都可以望到地中海美景，無論位處喺香港邊區都話有機會睇到廸士尼煙花景嗰啲呢。

話說堅叔見到自己新世界嘅樓書，個海景執到亁淨企理海闊天空風平浪靜實在靚得太假，立即勒令要喺個海度加幾隻船。點解呢？原來堅叔好細心，覺得真正嘅海一定會有船喎，費事俾啲人話地產商成人用啲假景假嘢呃人就唔好啦。不過咁，個海人工加幾隻假船上去，又有幾真呢？無論點都好，堅叔鍾意玩船呢家嘢，自此之後大家都知，做親新世界嘅樓書，就會醒目自動波加番幾隻船嘞。