皇后碼頭這個即將消逝的港人集體回憶，勾起不少藝人在該地留下的深刻回憶，對於是否支持清拆計劃，大家有不同意見。

鄭少秋

記得五、六十年代，皇后碼頭係「嘩啦嘩啦」電船嘅上落碼頭，我去完夜總會登台都要去嗰度趕船返屋企。我對嗰度都好有印象，我反對清拆，因為皇后碼頭好有特色，應該喺原址保留，做大家嘅集體回憶。

謝賢

以前去皇后碼頭係搭「嘩啦嘩啦」電船，其實嗰度都保留咗50幾年，如果配合區域重建需要清拆嘅話，我都贊成嘅，始終社會係必須不停進步，同時都可以美化城巿。

李司棋

我係一個惜物嘅人，雖然皇后碼頭唔及天星碼頭咁歷史悠久，不過我以前拍粵語片都成日去皇后碼頭取景，男女主角次次有重要嘢講都去嗰度，可能向住個海講嘢會有感覺啲。印象中以前次次有皇室成員訪港，都會喺皇后碼頭上落船，嗰度唔算好靚，又唔算最舊，但係一話要清拆我就覺得好唔捨得，香港係話要發展，但點都要保留番啲有特色嘅歷史地標。

逝水流年

皇后碼頭曾在無數電影、劇集甚至廣告中出現，有無數明星在該處留下足迹，這一切一切，都將成為回憶。