一個杜汶澤,一個歐錦棠。佢咊嘅身份,都係演藝人,都係星斗小民,亦都係……高呼「我係香港人﹗」嘅一份子。無奈向北望主動被收聲嘅香港演藝人太多,搞到好似得番呢兩個「儍佬」咁,會開咪鬧,會開咪寸,會開咪笑……用文字開咪。
杜汶澤今日就開火鬧爆水貨客,其實噚晚歐錦棠已經早佢一步,喺facebook寫道﹕「我一直贊成『中港融和』,話晒同飲珠江水,你上面班友咪落嚟做水貨,咁我哋就上去做水療,河水不犯井水。」
唔止咁,歐錦棠仲送多個爛gag俾你,話返大陸過關千祈唔好講錯嘢,如果唔係郁吓畀人扣留就唔好啦,佢話:
「有次同老婆北上,喺皇崗等緊過關,嗰日好多人,輪得好慢,老婆同我隔開咗兩個人喺我後面,個個都燥燥哋。
突然老婆隔住兩條友問我:『喂,你睇清楚你回鄉卡到期未呀?』
又嚇我,我知我之前衰過.......
『未呀.....』我話。
過咗一陣,佢又問『死喇!換咗人民幣未呀?』
『未呀!』過咗關先換都得嘅啫,爭得幾多。
到差唔多仲有一個人就輪到我嘞,佢又突然喺後面大聲問:『咁你打電話mark咗師傅未呀?』
妖!就到我喇,點同你講嘢呀?我好快擰轉身好大聲咁同佢講:『哎!未~未呀~!』
之後,我冇去水療。
我被人請咗入去問話三粒鐘,我唔知點解。
我真係唔知點解啲人會咁怕人講:
『哎未未三個字!』」
你話呢個經歷,是真?是假?XDD