一連3場嘅「G.E.M. "Queen of hearts" 世界巡迴演唱會2017 香港站」演唱會噚晚圓滿結束，佢喺完騷後於後台接受訪問，被問到點解唔答應對方求婚？佢話：「我唔識佢㗎喎！（男友有咩反應？）我都唔知自己同身邊嘅人應該有咩反應，睇到嗰陣時都好錯愕。今日下晝成班朋友喺WhatsApp group度講緊，仲講笑話求婚應該有戒指，點知佢今日真係有戒指喎！」

有人見到佢孭住工作人員證件，問G.E.M.其實係咪夾？「佢係VIP飛嚟嘅，1980飛嗰啲。」問到佢男友Mark喺唔喺個WhatsApp group入面，G.E.M.話：「佢覺得我唔會應承囉。」

G.E.M.喊咗幾次，問到係咪好感觸？佢話：「係啦，前兩晚都係一度落淚，今晚唔知咩事。」成個演唱會，佢叫咗好多次「Hong Kong」，咁佢有冇數過幾次呢？佢答：「我都唔知呀，喺台上其實冇諗到自己講乜嘢。」係咪口頭禪嚟？佢就話：「嗯……都係有幫助，每次我一叫啲fans就俾會反應我。」

有西裝男Fans求婚，如果男友向G.E.M.求婚，G.E.M.就話：「到時先知。」佢仲話自己恨嫁：「以前天真，想22歲結婚，之後就25歲，點知o依家都26歲，唔靈就唔諗啦。」佢就話如果真係有人求婚，會認真考慮。