雖則話今日係包圍無綫，查實大家嘅焦點，仍然落喺「ATV焦點」之上。網民曾先生鬧爆亞視執行董事盛品儒小器，皆因盛生次次出嚟都講城電王維基嘅衰嘢、例如指王維基喺亞視做CEO期間偷咗好多機密資料之類。曾先生話﹕「亞視根本就不思進取，究竟佢係咪同王維基有仇？定係驚人哋阻住你，發牌之後爬過你頭？」

至於遲來支持嘅馬先生都話，亞視成日作新聞，問佢有咩例子？佢話﹕「好似江澤民死訊咁啦。其實無綫新聞都自我審查緊，根本唔應該係咁。希望快啲發多個牌，俾觀眾有選擇。」又話前朝曾蔭權政府已講過要發多個免費電視牌照，佢希望當朝政府唔好出爾反爾，一味拖喎。