由孔劉、金高恩、李棟旭等人主演嘅tvN新劇《鬼怪》今晚播出第4集，承接上一集劇情，金信(孔劉飾演)要離開，但池恩倬（金高恩飾）就唔想佢離開，去到金信住嘅地方承認自己見到金信身上把劍，證實自己就係鬼怪新娘。

池恩倬話自己一開始就見到把劍，反問金信自己仲係唔係鬼怪新娘，金信話係之後池恩倬就勁開心。金信問點解一開始見到唔講，池恩倬話第一次見面話見到好失禮，之後因為覺得好驚就冇講，金信就叫佢喺門口等，之後金信衝入屋向陰間使者王餘（李棟旭飾）講金高恩見到把劍，話自己會死。

池恩倬向金信講述自己嘅悲慘身世，話自己冇地方住，求金信收留佢，金信先叫佢入屋等，之後同王餘商量叫池恩倬走人，不過池恩倬見到屋企咁大就唔肯走，連金信畀500萬佢都唔肯走，仲搞鬼地問金信鍾意邊類型嘅老婆：「賢妻良母？性感？」池恩倬又問金信聽唔聽到佢心裡話，金信就話自己講大話，其實一直都聽唔到。

金信安排池恩倬住喺酒店，德華（陸星材飾）爺爺叫德華好好照顧、服侍池恩倬，池恩倬開始就住喺金信屋企，不過金信似乎因為遇上鬼怪新娘而感到不安，又話自己患上失眠、憂鬱症要食藥，場面搞笑。

德華送池恩倬返學，引起轟動同圍觀，搞到池恩倬勁尷尬。鏡頭一轉，池恩倬阿姨一家將金拎去賣，不過就畀金店老闆當小偷送去警察局。當警察問佢哋住邊、姪女叫咩名，但佢哋都答唔出，似乎金信改咗佢哋嘅記憶，令池恩倬嘅麻煩少咗一宗。

同時王餘為遇上Sunny(劉仁娜飾)一事感到相當困擾，一直諗自己點解見到佢會喊，德華就叫佢試下相遇嘅天橋踫下運氣。之後金信因為又有熟人喺外國離世，佢就換上一身正裝離開。池恩倬掛住金信，自言自語地問點解金信唔嚟，又去到金信屋企門口大叫，又問自己仲要等幾耐，不過冇人答佢，十分傷心。

池恩倬最終用方法召喚金信，問佢係咪避佢，金信話唔係，但池恩倬依照好嬲，認定金信係避佢。不過金信就避開話題，帶咗池恩倬出去便利店食晚飯，又一齊行公園，好Sweet，不過原來金信飲醉酒。

池恩倬問將劍拔出會點，金信難以開口，最終都冇講其實自己會死，只係話將劍拔出自己會變得更有型，池恩倬信以為真，話為咗將金信變得更型，約定喺初雪將劍拔出。之後因為金信開心，導致冬天開花，成為一大奇觀。

德華問金信到底發生咩事，但金信瞓醒覺完全唔記得自己飲醉時做過啲咩，金信見到德華飲奶時就記返起噚晚嘅事，突然大叫嚇親德華同王餘，又話自己將「拔劍」嘅事講咗畀池恩倬知，似乎好後悔。同時王餘一直諗起Sunny，就連街上所有經過嘅人都變成Sunny，令佢十分懊惱。

金信去接池恩倬放學，話帶佢去食飯，點知行行下兩人又穿越咗，去咗加拿大，兩人喺噴水池前傾偈，池恩倬突發奇想話要拔金信把劍，嚇到金信即刻走，之後又將水變成劍，令池恩倬大呼神奇。之後金信坐喺一邊等池恩倬，見到池恩倬笑住跑到自己面前，立即畀池恩倬電到，仲話「一直笑住向我跑嚟嘅佢，呢一瞬間我被佢深深吸引住，心臟撲撲咁跳，呢個就係初戀吧。」