煲碟王：《最強．李小龍電影全集》
數碼修復至靚聲畫
蘋果日報 2004/05/02 08:00
李小龍會
電話：27717093
地址：旺角彌敦道530號現時點商場160-161號
由VHS錄影帶，至LD、VCD及現在的DVD年代，李小龍電影珍藏版都唔知出過幾多套，不過據香港李小龍會會長黃振強表示，仍然以今次《最強．李小龍電影全集》收錄最齊；現時市面買到的所謂李小龍珍藏版電影，一般只收錄版權屬嘉禾的《唐山大兄》、《精武門》、《猛龍過江》、《死亡遊戲》、《死亡塔》5套電影，由於《龍爭虎鬥》屬嘉禾及華納合作拍攝，緣於版權的問題，始終未有人能一次過收錄6套，今次港版3區竟然首度作完全收錄，實在令人感到非常光榮！
以往「龍迷」買李小龍DVD，都會首選1區美版甚或韓版及日版，主要貪佢聲畫表現較靚也，不過今次港版3區套裝一出，不論聲畫表現都絕對有「拍得住」的優勢！事關全輯DVD的影像，都經過FortuneStar以最新電腦數碼科技作重新修復，以往暗啞唔出色嘅畫面，馬上變得實淨有色水，不過最開心是聲效重新以dts5.1聲道作表現，大家除咗可以享受音效環迴游走外，音效表現細膩亦是強項，好似以洲立作傳媒首影的《猛龍過江》為例，一幕苗可秀在家裏閒逛，她頸項上所帶的金屬鏈所發出的微細聲響，都清晰可聞，實在非常厲害；至於喜歡原汁原味者，DVD內又一樣有原裝音效選擇，真係做得非常有誠意。
雙截棍係李小龍成名武器，大家有冇見過佢笑晒口，喪打雙截棍呢？又或者舞雙截棍失手NG呢？如果想睇呢位英雄偶像鮮為人知蝦碌的一面，第7張碟《最強ULTIMATE》必睇。
戲中嘅李小龍大家見得多，但現實中嘅李小龍又係一個點樣嘅人呢？Bonus碟內有名人口中的李小龍，特別請來曾與他合作拍戲的洪金寶、董瑋及蔡瀾等，論述他們所見的事迹，李小龍迷必睇。