當年今日
關於我們

假髮豔服狂野大突破
Twins俾洋漢係咁Fing

蘋果日報 2002/08/09 00:00


平日以純情形象掛帥的Twins昨日出席演唱會記者會時,戴上假髮扮鬼妹,騎住兩個健碩外籍男子的膊頭進場,又被抱起打轉,大跳勁舞,首次作狂野演出。
下月Twins在紅館舉行的演唱會以嘉年華為主題,製作費達七位數字,並於昨日在港麗酒店舉行記者會。
Twins戴上假髮、身穿鮮豔服裝出場,並由兩個外籍猛男托在肩膊上,跳着勁舞,表演「PongPong」show,二人又被抱起打轉,一反平日清純形象。

假髮似番狗
對於昨日的一身打扮,蔡卓妍(阿Sa)笑言是「番狗」,而拍檔鍾欣桐(阿嬌)則指自己是「洋狗」。問Twins騎在男士身上會否感尷尬?二人異口同聲表示不會,阿Sa說:「做嘢啫,平時跳舞同男dancer都會有身體接觸,唔好用呢啲觀點睇啦,而且我哋都冇嘢畀人掂。」

每日勤練舞
近日Twins每天會花十小時練歌和學體操等練習,昨日她們即場作「PongPong」表演,據她們的經理人霍紋希(Mani)透露,「PongPong」表演是人叠人騎膊馬,人牆更可叠至一層樓高,Mani說:「我哋想幫佢哋買五千萬保險,但唔知有冇人受。我哋會睇吓安唔安全,如果可以用威吔就會叠到一層樓咁高,如果唔得就減低高度。」阿嬌表示對這表演有點擔心,阿Sa則說:「真係搵條命嚟做賭注,不過買保險就有咗定心丸。」
另外,Mani表示Twins演唱會的性感服裝要花上六位數字金額外,還應二人要求做了徐小鳳招牌魚尾長裙,又會找來兩位有性格的男歌手,反串扮演Twins《孖寶668》的造型拍攝短片,不過Twins現階段賣關子拒絕透露兩位男歌手是誰。
採訪:王連連
攝影:仇志德