大家無睇錯，全國政協副主席兼前特首梁振英，公開否認自己係中國共產黨員，同時又話身在香港嘅中共黨員，完全可以大膽啲講出嚟。係咪好似曾相識呢？

被港區人大代表、工聯會會長吳秋北批評係反中亂港嘅網媒《香港01》，今日引述梁振英接受深圳衞視專訪時，被問到係咪共產黨員。梁振英就否認話「當特首前後也不是」，因為《行政長官選舉條例》要求，特首就職時要宣誓不屬任何政黨，「所以我不屬於共產黨，一直也沒有參加任何政黨」，佢仲話，如果喺香港社會入面有中共黨員，完全可以大膽講出嚟，事關長期以嚟，香港都強調「兩制」，搞到一講「中共」就好敏感咁。

其實梁振英否認係中共黨員呢個消息，9年前都講過啦，重點係點解今時今日要重提？咪就係個時機囉，連梁振英都特別拎《行政長官選舉條例》嚟講，畫公仔唔使畫出腸啩？

-----------------------------

蘋果App大升級 更簡潔更就手！了解更多（立即下載體驗）