油尖旺大南區原區議員、經民聯莊永燦上月中因肝癌離世，政府早前已刊憲宣佈會為大南選區安排補選，呢場選戰預料會喺明年3月或4月進行，經民聯一早敲定於莊永燦議辦任義工多年嘅李思敏出選，民主派經一輪協調，暫料由社區前進李國權出征。

有地區人士向八方報料，佔接棒優勢嘅李思敏今個月已經開始宣傳攻勢，有商店已經貼出其宣傳單張，更掛出多幅「單頭」宣傳橫額，但就懷疑違規，因為一般而言，地區人士要同立法會議員或區議員「孖頭」出橫額，而李不單係單頭宣傳，橫額上更冇展示核准編號，即使有關橫額位屬於經民聯亦懷疑唔啱規矩。八方搵過李思敏，佢話對違規況唔清楚，亦冇收過投訴，透露橫額位係經民聯議員借出，由義工朋友幫手掛上，強調「如果有掛錯，我馬上去了解」。

除咗經民聯料派李思敏奪回議席外，據知喺該區工作年多嘅社區前進李國權勢必出戰搶位。八方聽聞原本一度有意參戰嘅「九龍角落」則喺民主動力一輪協調後退出戰團，九龍角落主席李軒朗回覆《蘋果》查詢證實，早前擬參選、與港大校委會主席同名同姓的李國章，已退出九龍角落，唔會參選，九龍角落亦冇打算派人補上，但組織其餘地區工作者會繼續工作。民主動力召集人趙家賢就同八方講，呢區嘅協調進度正面，只餘技術細節要處理，感謝雙方參與，集合力量對抗建制陣營。