日本男星小栗旬貴為影視紅人，當孭飛嘅真人版電影《銀魂》系列大受歡迎，令佢進一步奠定影壇地位。《銀魂2》在日本票房已破35億日圓（約2.45億港元）、269萬入場觀眾，刺激小栗旬嘅身價又再上漲，有指佢趁住強勢將於明年進軍荷李活市場。

35歲嘅小栗旬育有一對子女，囡囡四歲、囝囝只滿一歲，日前佢同老婆山田優外出購物，終於可以享受天倫樂。近年山田優負責湊B，小栗旬自然成為全家嘅經濟支柱。有報道指，小栗旬一直恨進軍海外，最近終獲邀參演一套美國動作電影，佢打算明年帶埋老婆仔女赴美國洛杉磯生活，望可以順便於當地學好英文。

雖然事務所方面稱未有赴美計劃，但查實小栗旬曾在七年前一度攻入大陸，原本拍住范冰冰合演中國古裝片《王朝的女人·楊貴妃》，點知開工一個月後，韓國導演郭在容拍拍吓臨時唔撈，連小栗旬都因檔期而辭演，令小栗旬賺人民幣大計泡湯。

精選娛聞，喺晒《娛果》
http://fb.com/appledailyent