煞科前幾天，與一位馬主茶敘，閒聊間，談到「馬王」選舉的預測。

馬主一派權威、一臉英明的說：我話馬會一定畀「巴基之星」做「馬王」，好簡單，「巴基之星」出自馬會拍賣會，有宣傳作用吖嘛。煞科後幾天，又與同一位馬主茶敘，閒聊間，談到「馬王」選舉的結果。馬主一派權威、一臉英明的說：「我都話咗馬會一定畀『美麗傳承』做『馬王』，好簡單，『美麗傳承』個馬主係馬會嘅贊助商，馬會梗係要擦住佢鞋喇！」

馬後炮不符馬前炮，不奇。馬後炮不符馬前炮，依然用上「我都話咗」，也不奇。類似情況多的是，見怪不怪。筆者只是由此想到陰謀論之盛行，連「馬王」選舉也持此論，何況涉及萬千金錢流轉的賭波賭馬！

很多年前，看過一位評馬人的一篇大作，主題是「佢哋」。「佢哋」是誰？每場賽事結束，總會聽到有人說：「呢場佢哋食飽飽喇！」熱門取勝，就是：「咁重飛，呢場佢哋食飽飽喇!」冷門取勝，就是：「咁好分，呢場佢哋食飽飽喇!」「佢哋」正是場場都食飽飽的「佢哋」。每個馬迷，彷彿都對「佢哋」了解甚深，起碼很清楚呢場「佢哋」又食飽飽了。

「佢哋」，是陰謀論的產物，也是陰謀論的主角。那麼，「佢哋」是否真的存在呢？

眾所周知，南宋抗金名將岳飛，是被奸相秦檜下獄處死的。另一抗金名將韓世忠不服氣，質問秦檜入岳飛以何罪？秦檜答以「莫須有」三字。「莫須有」照字面看，最簡單的解釋是「不須要有」。秦檜向韓世忠承認自己明屈岳飛？有歷史學家指出，「莫須有」是宋朝的潮語，意即「唔見得冇吖」。看來，對於「佢哋」是否真的存在，最合適的答案便是「莫須有」了。

關於專欄全文，可看7月22日《蘋果馬經》。