由成龍同基斯德加（ChrisTucker）主演嘅荷李活電影《火拼時速3》（RushHour3），噚日喺洛杉磯文氏大劇院舉行首映禮。本來成龍喺紅地毯上出盡風頭，點知新聞女王ParisHilton突然踩場，熱情嘅佢更加喺紅地毯上主動與成龍錫面，一向見慣年輕靚女嘅成龍都畀佢殺個措手不及。
噚日首映禮非常熱鬧，除咗成龍同基斯德加之外，有份主演嘅張靜初、真田廣之、工藤夕貴同身高7呎8吋嘅中國籃球員孫明明都有到場，眾人合照時，孫明明高出一大截，相映成趣。

劇情觸怒內地電檢

由於成龍已經好耐冇拍過荷李活片，因此噚日佢嘅fans特別多，點知當佢同fans狂簽名影相之際，出位名媛Paris突然現身，咁啱佢噚日又話賣屋，真人騷《TheSimpleLife》又被停播，於是記者全部蜂擁埋去採訪，搞到成龍備受冷落。不過Paris後來都好識做同成龍錫面sayhi，一向鍾意捧女星嘅成龍，唔知有冇打佢主意呢？
此外，由於今集《火拼時速3》故事涉及中國黑幫情節，雜誌《Variety》報道話內地電檢當局好唔滿意，批評套戲侮辱中國人，當局亦冇知會電影公司叫佢哋重新剪片，因此齣戲會唔會喺內地上映真係未知之數。