台灣天后蕭亞軒曾說去年底會發專輯，但就一拖再拖，今日台灣有周刊就傳話佢患咗怪病，嚴重失聲，被迫放棄億元新台幣(約2千6百萬港元)。

報道指，蕭亞軒除了專輯難產外，上月台灣嘅富邦集團尾牙，原先請咗佢去表演，但佢亦甩底，未能參與演出，改由蕭敬騰任嘉賓。除咗未能參與富邦尾牙演出，蕭亞軒原訂於今年4月大陸舉行13場演唱會，亦因為佢一句「不唱了」，等同推掉1.2億新台幣嘅演出酬勞，即超過3千萬港元，佢嘅經理人公司亦將之前收到嘅唱酬退還俾主辦單位。

而平時都愛喺社交網更新個人狀況嘅蕭亞軒，最近亦消失於fb、ig 同微博，而佢嘅經理人公司就解釋話，蕭亞軒去年因為新專輯去咗洛杉磯練舞，可能因為求好嘅心太大，增加咗佢嘅壓力，無端端發咗一個禮拜高燒，最後因為佢嘅健康因素，先決定取消商演、代言、新專輯，至於籌備中嘅巡迴演唱會亦會無限期壓後。佢嘅經理人公司仲話，農曆新年後，蕭亞軒已開始接受中醫同針灸治療，中醫亦配方咗保養喉嚨同氣管嘅藥方俾佢，希望佢可以喺暑假復工。

精選娛聞，喺晒《娛果》
http://fb.com/appledailyent