搞到影癡冇覺好瞓嘅香港國際電影節喺星期二開鑼，好多電影發燒友都呻話今年特別難撲飛，莫講話韓國型男Rain主演嘅《再造人之戀》唔夠班𡃁妹仔搶飛，連想昅吓鬼才導演洛比桑嘅鬼影都唔得，加上好多場戲都晨早滿座，惟有返歸睇DVD頂戲癮。
戲癡苦埋口面，電影節協會主席王英偉就笑騎騎，原來500場電影已經賣咗好多飛，總票房有破紀錄300幾萬，好景過上年多多聲。個場咁旺係因為大會好識搞噱頭，整咗個亞洲電影大獎，鋪晒紅地毯俾啲中外明星行貓步，盲目粉絲盲摸摸就入咗戲院撐偶像。呢班電影節新丁當正戲院係紅館，見到偶像Rain出鏡，竟然𠵱嘩鬼叫抗議有kiss鏡頭，嘩到唔少導演同影迷心煩意亂，認真失禮。