鎮台之寶阿姐汪明荃，今晚以嘉賓身份頒獎最佳劇集一獎，頒獎前，阿姐提到自己近年甚少拍劇，但亦有留意TVB嘅發展。

阿姐除咗話每部劇都係百幾人嘅心血外，仲話要睇一套劇收視好唔好、成唔成功，的確係要睇天時地利，仲話收埋喺大台個倉入面嘅劇，無論係頂、中或倉底都係精品，令到一眾藝員鼓掌叫好。

嗱，阿姐即係阿姐，講嘅嘢又點會咁簡單？佢之後再提到頒獎禮係咪有遊戲規則嘅講法時，就話：「係咪有遊戲規則去決定㗎？嗱，作為一個過來人，我都喺啲頒獎禮度攞過8次獎，嗰幾年我冇埋堆、冇派系，我又冇送禮物畀邊個邊個，我又唔係傾緊續約，我完全冇扭計，亦都冇人搵我傾過偈，仲有，我唔係完全聽話㗎，唔係話你叫我做乜就做乜，可能仲得罪咗好多人，我都唔知呀，我只係做咗一樣嘢，就係，做！好！自！己！所以大家攞到獎，唔好淨係第一時間多謝珍姐、杜生、樂小姐、Sandy啦，我唔該你哋，多謝番自己，我覺得最應該多謝嘅係你！自！己！因為你真係付出咗好多努力，攞獎係應該嘅！不過講到尾，我哋都應該係多謝TVB嘅，因為如果唔係TVB，我頭先講嘅嘢係唔會發生。」

之後阿姐就宣佈最佳劇集係由馬德鐘、歐瑞偉、劉佩玥等主演的《跳躍生命線》奪得。

精選娛聞，喺晒《娛果》
http://fb.com/appledailyent