多得基斯坦奴朗拿度（C朗）完場前8分鐘射入12碼扳平，令皇家馬德里主場逼和巴塞隆拿1:1，主帥摩連奴不致又被落面，賽後重現寸王本色，喺記者會向馬德里記者「以彼之道還施彼身」，進行大報復。
摩連奴將呢場波賽前嘅記者會交畀助教卡蘭卡主持，佢就不發一言，呢件事令好多記者認為摩帥唔尊重佢哋，有人即時離場。好嘞，到比賽完畢，大家屏息靜氣等睇摩連奴台戲，果然佢一係唔開聲，一開聲就寸爆嗰隻。當一位馬德里報章嘅記者發問時，摩帥答：「你係咪《阿斯報》總監？如果唔係，恕我唔回答。我只係跟你哋嘅哲學行事，你哋唔同我副手傾，我就只會同你哋總監傾。」

之後，嚟自馬德里記者問其他問題，得到類似嘅答案。摩帥就話，連卡蘭卡呢個球員時代為皇馬贏過3次歐聯嘅人，記者都覺得佢未夠資格做代表，仲有咩好講喎。不過摩帥唔係對所有記者都咁重手，對巴塞隆拿同埋海外記者就有問必答，擺明大細超。鬼咩，摩帥今季執教皇馬後，馬德里記者對佢嘅一切窮追不捨，而摩帥周不時唔畀佢哋採訪操練，雙方關係好僵。
講番場波，皇馬同巴塞平分春色，C朗、美斯兩個各入1球12碼。當然，對皇馬嚟講呢1分相當驚險，因為喺52分鐘輸12碼嘅同時，犯規者艾比奧爾因為係防線最後一個，衰到被罰離場。皇馬10人應戰下幾經辛苦逼和對手，賺咗囉！皇馬依然落後巴塞8分，但至少冇再俾人食住。呢次只係兩軍短期4次對陣嘅首部曲，已經咁多故事，禮拜三輪到西盃決賽，怕且一樣好多古講。