近排有指吳卓羲喺因為喺方丈大台冇獎攞，而感到心灰意冷，有意離開大台。今日吳卓羲喺將軍澳宣傳嘅時候，就承認一直有中港公司斟佢過檔，佢話﹕「未決定，係朋友問起，當時仲有一年半載約，我話到時再傾啦。」

咁係咪因為冇獎攞而心灰意冷？佢就話：「呢啲睇緣份，最重要角色同對手，錢都係其次。我亦認同林峯所講，每個人都係個體，冇人影響到自己決定。」活動完咗之後，佢就要趕返內地拍劇。