本地獨立樂隊Mylittleairport兩位成員阿P及Nicole瞓身支持「佔領運動」，不時落區，仲寫過好多歌都係關於上街，示威，為咗「雨傘革命」，佢哋已經寫咗首《今夜到干諾道中一起瞓》，入面有一句:「到處也是睡醒了的人」究竟香港人瞓醒未，就真係唔知，不過強國班高官應該唔願醒，你講嘢唔啱聽，唔使理，封殺你就得。

早前傳出何韻詩，杜汶澤同黃秋生是封殺頭號目標之後，阿詩承認內地工作的確少咗，而寫過好多「唔啱聽」嘅歌嘅Mylittleairport，原來名氣都已足以入封殺名單，今日佢哋喺fb話:

「緊急通知：原定於2014年12月6日在TU凸空間舉辦的MyLittleAirport演出，因報批問題確定取消。TU凸空間將會對已經購票的觀眾盡快安排退票，請大家密切留意最新消息。」

今年Mylittleairport原定已經喺內地會搞3場騷，分別係今個月21號喺上海，23號到北京，下個月6號去廣州。o依家廣州方面率先「做嘢」，唔知其餘兩地會唔會又突然「唔批」，不過呢個時代，張回鄉証都可以突然失效，有咩唔會發生呢?所以都有網民話:「就算唔禁可能都過唔到關....」又話:「快改名做《健康道德聖誕樂融融音樂會》」亦有內地網民哭求:「求香港加開一場，我們過去看」