【獨家】孖老婆超市買餸 55歲杜德偉不忘扮Cute玩自拍
超級市場杜德偉買餸
現年55歲嘅杜德偉(Alex)去年10月榮升做老竇,囝囝Alex Junior話咁快已經8個月大,日前橫風橫雨之下,Alex兩公婆冒雨到中環嘅citysuper超市買餸,由於天氣咁差,佢哋當然冇帶囝囝出街吹風淋雨啦,同行變咗一位女友人,三人喺超市快閃買食物。
現場所見,由身為家庭主婦嘅杜太全權負責揀食物,主要都係買生菜、蔬果、麥包等健康食材,肉類只係買咗好少量,戴黑超嘅Alex初時都有跟喺老婆後面陪買餸,但冇幾耐佢就就掛住同女助手研究扮動物變面嘅影相app,似乎係助手教緊佢點樣玩,Alex即刻變身大細路咁,覺得好新奇,表現得好鬼有興趣,最後仲玩到黑超都除埋,對住手機玩自拍,其間杜太問老公買呢啲好唔好,玩到忘我嘅Alex只係hea答咗兩句,睇嚟佢返到屋企之後,應該會搵囝囝做model玩餐飽。
大約半粒鐘之後,杜太已經買好晒需要嘅食物,三人齊齊去排隊畀錢,Alex當然好有風度負責做阿四,攞住大袋嘅超市食物離開,由司機駕駛保母車返家慰仔。