李日朗（前名李逸朗）去年被女性友人騙財近300萬，今日佢喺尖沙嘴舉行記招交代事件。

李日朗話同女友人已經認識6、7年：「我哋喺廣州一個酒會上認識，2017年10月，我畀咗200幾萬佢，授權幫我投資。喺2018年4月24日，我檢查呢個戶口嘅時候，發現冇任何股票存入或者買賣紀錄。」

另外，由於女友人聲稱朋友要緊急手術費，李日朗動用公司嘅備用資金，以私人名義借左70萬畀佢，但其後女友人失蹤：「我4月24日發咗律師信，要佢一星期內還錢，但佢已經消失咗。」佢話之前一直唔報警，因為仲等緊朋友出現，但期間李日朗收到其他受害者電話：「都有4、5個，其中一個仲係退咗休嘅伯伯，呢幾個月不停搵唔同生意嘅老闆，咩都做，拯救自己，呢幾個月俾人侮辱好多次。」

李日朗坦言o依家負債200多萬，唯有努力工作去填錢：「唔係差銀行，係差朋友，咁仲慘，佢哋越叫我唔急，我越唔開心。因為公司筆資金，有朋友同屋企人嘅錢喺入面，無咗資金亦影響咗我公司嘅生意，有幾單生意告吹咗，仲要畀番賠償金。」李日朗希望警方可以搵到女友人，交代清楚件事：「200幾萬係多，但最重要係朋友嘅感情流失咗，人哋都係信我先同我合作做生意，但係人哋都會急住用錢。」

李日朗直言今次一鋪清袋：「好彩，都有支持我嘅朋友同商家，介紹工作俾我維生。我業主都好好，出事之後，我同佢講可能交唔到租，佢叫我處理咗自己嘅事先，我o依家開始還緊之前嗰啲（租金）。」

精選娛聞，喺晒《娛果》
http://fb.com/appledailyent