西甲季軍馬德里體育會，因國際足協禁令今夏唔可以買人，一眾球員都齊心留住度過難關先算，好似前鋒基沙文、中場沙奧尼古斯同佐治高基，仲續埋約添。33歲前鋒費蘭度托利斯（費托）原本希望上季結束後，就轉往墨西哥發展，不過睇到母會有難，費托都決定留馬體會多一季。

據西班牙《阿斯報》報導，費托已經答應同馬體會續約一季，不過條款都有彈性，明年1月馬體會禁令結束，可以收購到球員後，費托就可以同馬體會解約，自由身去墨西哥發展。