37歲嘅王力宏同細佢10年嘅李靚蕾閃婚，之後就引發咗曾經同王力宏有斷背攣聞嘅鋼琴王子李雲迪，喺社交網示威式宣佈田霏嘅女友地位，隨後又引發網民人肉搜尋李靚蕾，爆出李靚蕾2月先至同前男友DarwinHuang訂婚，但突然轉呔同王力宏閃婚，事件錯綜複雜。有報道話DarwinHuang係香港執業律師，未婚妻竟然成為王力宏老婆，知道「婚訊」之後，Darwin激動到當場喊爆，之前喺佢facebook到仲有親密照可以睇到，但最近已經被刪除咗。

噚日有網友發微博曬王力宏老婆李靚蕾現身王力宏演唱會嘅相，今次係李靚蕾同王力宏結婚後首次同場出現。兩個人得到大家嘅祝福，同時仲畀現場觀眾催生BB，喺王力宏演唱會上面，全場大叫「王一」，王一係王力宏以前講笑嗰時、講過要為將來個B改嘅名，王力宏喺現場回應：「請給一點時間，會努力的。」

12月22號晚，李靚蕾坐喺觀眾席前排，紮住清爽馬尾，一身黑衫亮相，王力宏身穿白色西裝，向住老婆深情演唱，李靚蕾表現感動。

王力宏新婚，但就不斷畀負面新聞圍繞，佢早前透過經理人表示:「對於網路上或媒體有相關不實的傳言，已影響到我與家人的生活，如再有不實傳言未經求證而報導，經紀公司必定尋求法律途徑處理。」經過王力宏嘅經理人表現態度強硬，其婚姻負面新聞亦暫時告一段落。