上周五晉佳講過，恒生指數市賬率1.33倍，處歷史低水平，反映低位會有支持。呢條數係由恒指價格，除以恒指嘅每股賬面值，要市賬率回升，一係作為分子嘅恒指上升，一係就要分母嘅每股賬面值下跌，只要每股賬面值大幅下挫，同樣可以令到市賬率由平，變成唔平。
根據彭博資料，過去20年恒指每股賬面值絕大部份時間係上升，當中只有97至99年曾經由最高7550點，跌到去最低4900點，跌幅達35%。晉佳相信每股賬面值大跌，係因為當年本港樓價急挫，令資產價格下滑，同時企業錄得巨額虧損所致。至於金融海嘯，亦只令恒指每股賬面值跌唔夠10%，而且大概一年後就升番去之前高位。
今時今日，藍籌股持有唔少中港物業同固定資產，除非閣下認為兩地樓市會喺短時間內崩潰、急瀉幾成，否則每股賬面值好難有下跌空間，間接為恒指帶嚟支持。如果兩地樓市唔升唔跌，藍籌股仍然能夠賺錢，每股賬面值就可以慢慢升，股市亦都有本事上升。
正因為咁，晉佳認為港股下跌空間有限。如果你認為港股有崩潰嘅可能，即肯定樓市跌勢會比股市跌勢更可怕，更講唔上樓市升、股市跌將持續好長時間。四叔話買股好過買樓，其實有佢嘅道理。
講番上周港股，連續3日回吐，交投量更連跌3周，去番08年12月至09年3月嘅低水平。如果計番每月嘅日均成交，原來今年6至8月，已經去到金融海嘯後嘅08年11月至09年2月水平。至於09年3月之後發生乜嘢事，相信都唔需要多講。