【李八方online】網民幫党鉄改新站名 銅鑼灣變「催淚灣 TG Bay」
蘋果日報 2019/09/16 18:20
李八方ONLINE港鐵逃犯條例反送中逆權運動黨鐵
如果由6.9百萬人上街計起，反修例運動今日踏入100日。「多得」前特首梁振英喺7.21後狠批港鐵喺衝突期間冇封站，讓示威者「免費乘車離開」，結果令港鐵被中共喉舌《人民日報》咬實唔放，從此港鐵多次配合警方行動，拉閘、飛站、封站乜都做得出，「党鉄」印象深入民心。
有網民因應反修例風波，替多個「党鉄」站重新命名，包括中環改名叫「終還」，英文名叫Judgement Day（審判日）；經常因為配合警方執法飛站同封閉嘅金鐘站就易名「今終」，英文名叫Often Off（經常停止運作）；近日警方頻頻發射催淚彈嘅銅鑼灣就被易名為「催淚灣」，英文名叫TG（Tear Gas）Bay；接連有福建幫打示威者嘅炮台山同北角，分別被稱為「福建西」同「福建東」，係咪睇到大家笑中有淚呢？
有特別好文采同創作力嘅網民，仲一連創作多個喺南港島線、荃灣等線嘅新黨鐵站名稱，包括「黃布（黃埔）」、「攜衝（葵涌）」、「嚟！支割（荔枝角）」同「厲警（荔景）」等，亦有人建議將元朗列為禁區，獨立成為元朗國鐵，上車前要先出示護照。至於最多網民表示傷感嘅就係「尋子」站，皆因警方8月31日晚無差別於太子站襲擊市民後，至今有網民懷疑此站死咗人，「尋子」呢個名，充份顯示市民對政府嘅不信任。
有網民為「党鉄」一連創作多個車站名。