當年今日
關於我們

一味窩輪:Put輪今朝也文也武

蘋果日報 2003/01/27 08:00


美股上周五大散,港股今日都好難有運行,睇吓恒指究竟係跌1百點抑或2百點。港股裂口性下跌開出,恒指Put輪同藍籌Put輪自然也文也武。
炒家焦點,將先集中喺交投最旺嘅恒指Put輪,例如9556、9559同9587等。呢啲輪高價開出,例如先升15%以上,追落去,可能水位有限,甚至到收市時大市由低位反彈,輪價未能以全日高收,早段高價搶貨者變成摸頂攞貨,先吃眼前虧。冇賭徒性格嘅股民,最好觀望住,睇人玩而自己唔落場。
美伊局勢緊張,暫時情況不利,但未必冇好發展嘅契機。美國忽然開戰,三下五落二戰事結束,大市即消除一個不明朗因素,急速反彈亦未可料,12年前老布殊指導嘅海灣之戰,全球股市喺開戰之初,即開始大升,有先例也。

763低價買番啲
中港旅遊前景光明,香港中旅(308)由去年10月1元邊邊到𠵱家升至1.35元。中旅今年睇好,大市若然唔妥,中旅回落至較低水平,例如1.25元,則不妨吼吓中旅公司輪763。
763今年6月夠鐘,現價15.6仙,溢價1.9%,槓桿率8.7倍,留意喺12至13仙左右買番啲。
章盛