《情逆三世緣》已經由宋代包青天年代去到五十年代嘅香港華探長年代，雖然有網民覺得關詠荷今次飾演呢個黑幫大佬辛虎(林偉飾)個老婆唔夠威，聲線亦略嫌低沉，不過娥姐精采演技，足以彌補一切。

其實呢個劇，只係講宋代，穿崩同唔合理位真係多如繁星，原來皇宮花園驚現鐵欄同彈弓床已經係小事，之後仲有音樂盒同夜視望遠鏡；但話佢先進呢，又先進唔晒，如高繼安(黃智賢)用西域七星蜈蚣毒害歐陽震華，竟然只係用一種特別嘅草做引，就可以將遠自西域嘅七星蜈蚣引到去汴京，真係勁。更厲害仲係，開封煲咗七種毒花入藥，製成七毒七花散，其中一種先係解藥，其他都係毒藥。先唔講點解唔煲多碗如果中咗唔使煲多次或者點解一座山仔可以搵齊七種毒花，最簡單就係何以六子唔搵老鼠試藥而用真人去試，已經係奇聞。歐陽震華當日就已經示範過用老鼠試食太子嘅膳食睇下有冇人下毒，點解開封六子唔識呢？更離奇都係歐陽震華醒番之後，面色話因為劇毒未除而變黑，但點解忽然由冇鬚變有鬚？點解有時額頭個月亮會唔見咗？？？通通匪夷所思。

去到五六十年代，穿崩應該少啲，而且有啲位都幾好笑，如噚晚一集講大奸角黃智雯偷咗dancer白雲件衫，然後扮晒嘢話借自己件細碼衫俾白雲著。白雲身形咁豐腴，上圍仲勁過黃智雯咁多，結果，一出到嚟………迫爆是必然的，更搞笑係件舞衣係銀色，胸前一間間直條子，結果白雲一「掙」——大家望吓張相，似唔似某品牌行李篋？

今集仲有另一亮點，就係獅子山下體——現香港精神。話說尾段時歐陽震華揸車載黃智雯上山頂遊車河，咁當然要留影啦，先嚟一張——就係獅子山下體現香港精神，仲有天星碼頭、香港會所同鐘樓。但，全部都係key圖嚟0架嘛，soft咗佢或blur咗就算，但點睇，都「逼真」過家陣尖沙嘴星光大道嗰幾塊巨幅「藍天與白雲」假圖嘅。