立法會議員容海恩同前社民連成員、網媒輔仁媒體主編「容總」容樂其一向老友鬼鬼，今日容海恩同沙田區議會主席何厚祥位於大圍嘅辦事處開幕，容總就一早到賀，由於該辦事處原屬被DQ喺長毛梁國雄，曾任長毛助理嘅容總就大爆「我以前喺度返工」。容海恩就話容總就自動請纓要嚟撐場。

今日群星拱照容海恩嘅辦事處開幕，除咗新民黨主席葉劉淑儀，仲有發展局局長黃偉綸，同盛傳已經辭職嘅律政司司長袁國強。葉太致辭時就話，「依個辦事處以前主人係一位長髮男士，而家換成短髮美女」，不過容海恩唔止靠美貌，都有實力，為街坊服務。

至於容海恩就大賣口乖，話多謝大家厚愛，仲話新民黨即將踏入7周年，係一個成就，多得地區支持，希望用理念感動街坊喎。

袁國強離開時未有回應離任問題，同埋修改議事規則中，將全委會法定人數降低係唔係違反基本法，只係話有會要開要提早走，佢臨上車前更加同記者講bye-bye，唔知係唔係語帶相關呢？