正所謂「何家淑女唔易做」,賭王何鴻燊多位千金日漸成長,逐步學習繼承父母產業,得到父母支持係最大推動力,四房長女何超盈(Sabrina)就「有辦你睇」,23歲就進軍酒店業一嘗女強人滋味,仲有阿媽四太梁安琪撐腰,獲贈逾2億元物業揸手。
超盈雖然曾經男女緋聞一籮籮,喜愛夜蒲,被批難以成為四太商界接班人,但去年於香港大學畢業後,超盈總算修心養性,擺脫從前那份任性,四太眼見女兒的起心肝亦感安慰,為獎勵女兒,早於去年已將旗下三個位於南灣道華景園的豪宅物業單位,轉讓給超盈,同時又任命超盈,擔任旗下三間公司董事,令女兒有樓揸手同時承繼產業。
超盈近日又積極跟媽媽學做生意,兩母女常一齊出席公開場合,其實是有意為女兒打入商界鋪路。
超盈自畢業後立刻投考地產牌照,以裝備好自己,隨後便開始接手母親喺香港嘅租務及酒店業務。據知超盈首個由佢策劃嘅酒店項目,已經密鑼緊鼓進行中,而選址位於中環,全都係佢一手包辦。
四太亦為女兒踏商界感到緊張,不時向身邊朋友打聲招呼,叫大家畀畀面,睇住佢個女。除咗香港酒店業務外,超盈之前到澳門親自接待DonatellaVersace(Versace副總裁兼創意總監),兩人十分投緣,初步仲落實澳門興建酒店合作計劃,以初出茅廬女強人嚟講,已踏出成功第一步。
為作多方面配套,超盈及媽媽一樣,開始參與社會公益事務,之前又到北京,在國家行政學會進修國情教育,想加入香港菁英會,實行商界政壇雙管齊下,為了當上女強人,要鍛鍊出周身刀張張利。